انا المسحراتى

Posted on 3:17 م - by smsma
انا المسحراتى
السنة دى قررت انى اشتغل شغلانة الشهر الواحد
قررت اكون مسحراتية ...هههههههههه
أحب اعرفكم على نفسى أنا المسحراتى الجديد لجيران ولكل المدونيين هذا العام
فى يدى اليسرى طبله واليد اليمنى جلدة لكى اطرق عليها
المسحراتى من الحاجات اللى انا بحبها جدااااااااا
وانا صغيرة كنت بقول لبابا ينادى ع المسحراتى عشان يقول اسمى ....ههههههه الكلام دا وانا صغيرة
وطبعا اول ما اسمع اسمى والراجل بيقولوا بكون فرحانة جداااااااا واروح تانى يوم المدرسة اقول للكل اللى فى الفصل
ويبقى هاين عليا انى اقول للمدرسة كلها .... الكلام دا وانا صغيرة خدوا بالكوا هههههههههه
ايام زمان غير دلوقتى ايام زمان كان المسحراتى لية اهمية دلوقتى فى ناس ما تعرفهوش او ما شفتهوش
لدرجة انى وانا صغيرة يا جماعة كنت بحلم بية طول شهر رمضان هو حلم واحد حلم ان المسحراتى بيقول
اصحى يا ......هههههههههه الكلام دا وانا صغيرة
طبعا وبناء ع القرار اللى انا اتخذتة انى اكون
مسحراتية شوفوا انا هقول اية
أصحوا يا نايمين يا مدونيين
أصحوا يا جيران
أصحوا يا ناس يا حلوين
أصحوا وأسحروا
وقولوا نوينا نصوم رمضان
أصحى يا نايم وحد الدايم
السعى للصوم خير من النوم
من قبل الفجر وانا بدور فى المدونات
وبدق بطبلتى
مسحراتى
منقراتى
وبصحى جيرانى
وبطبلتى بدق تانى
وأقول اْنا مسحراتى
أصحى يا مدون أصحى
أصحى وحد الرزاق
رمضان كريم
يعنى كل سنة بتعدى بيقل وجود المسحراتى
المسحراتى اصبح مجرد ذكرى حلوة اصبح وجودة مقتصر ع مسلسل بيتعرض فى التلفزون ومش كتير كمان
من ضمن الحاجات اللى فاكراها ان المسحراتى بيعدى ع البيوت وبياخد مبلغ من كل شقة فى العمارة
دلوقتى المسحراتى هواية يعنى انا للاسف مش هاخد فلوس للاسف كنت عاوزة اخد حاجة لله ....هههههههه
بجد اصبح دلوقتى شغلانة المسحراتى هواية اكتر ما هى باب رزق لحد
فى رمضان نلاقى فوانيس وزينا من اول الشارع لاخرة ومجسمات للمسحراتى مع الطبلة
ياااااااااااااة ايام كان جميلة بجد كان فيها احساس برمضان
من ضمن نوادرى مع المسحراتى ....وانا صغيرة يا جماعة ههههههههههه
كنت اول واحدة تصحى من النوم عشان المسحراتى طبعا
واروح اصحى البيت كلة عشان يشوفوا المسحراتى
طبعا كنت مصدر ازعاج للبيت فى شهر رمضان ومازال بس بينى وبينكم
فى النهاية انتوا فاكرين المسحراتى ؟؟؟؟؟؟؟؟؟
فكرين ايام زمان؟؟؟؟؟؟؟؟؟
ياااااااااااة ايام
فى النهاية بقولكم
انا المسحراتى ....ههههههههههه
رمضان كريم
وكل سنة وانتم طيبين


الامس واليوم وغدا

Posted on 4:00 م - by smsma

الامس واليوم وغدا
وانا قعدة امبارح فكونت بكلم بابا بخصوص المدينة الجامعية
واحنا بنتكلم والكلام ماشى زى الفل وفجأة لاقيتة بيقولى فكرى فى النهاردة شوية
وسيبى بكرة لبكرة
وانا قعدة مع نفسى وللاسف ما كنتش فى اسكندرية كنت رجعت عشان احضر ورق المدينة اللى مطلعة عينى
وطبعا كلهم فى اسكندرية وانا وبابا لوحدنا..... انا هعيط خلاص
ندخل فى الموضوع
معظمنا بيفكرفى بكرة ودى طبيعى جدااااااا وفى نفس الوقت بيفكر فى اللى حصل امبارح
ومش شايف النهاردة او مش حاسس بية اليوم بيعدى ويفوت
فى منا اللى انجز حاجة فى اليوم دا وفى منا بردوا اللى واقف وما بيتحركش وفى منا بردوا اللى مش عايش اللى ضربة طناش زى ما بيقولوا
المهم ان حالى هو حال كل الشباب (ولد وبنت) بنفكر علطول فى بكرة فى المستقبل
قليل جدا لما نفكر فى النهاردة
يعنى مثلا اصحى النهاردة من النوم بقول بسأل نفسى هعمل اية بكرة قبل ما اقول هعمل اية النهاردة؟؟؟؟
فكرة انى افكر فى مستقبلى دا شى كويس وكويس اوى كمان
بس لازم اعرف انا هعمل النهاردة اية عشان بكرة ان شاء الله؟؟؟
مش بس كدة كمان لازم اعرف انا عملت اية امبارح للنهاردة ولبكرة؟؟؟؟؟؟؟
لانى لما جيت حسبتها ودورتها فى دماغى لاقيت ان ما فيش حاجة هتحصل بكرة الا لما اكون عاملة حسابها النهاردة وامبارح قبل النهاردة
الفكرة كلها انى مش لازم نفسى بمعنى مش لازم انسى انى طالبة او طالب عندة 18 سنة عندى طموح للنهاردة
مش لازم ارمى طموح النهاردة عشان بكرة لازم افكر فى الاتنيين
ولازم ما انساش الماضى
خلينى اقول ان الامس واليوم وغدا هو ملكى وملكى انا وبس مش لازم اهمل حاجة فيهم لازم اخدهم كلهم بتوعى ملكى
وان صغيرة او معظمنا كان بيسال انا هكبر امتى ؟؟؟؟
يردوا علينا ويقولنا بكرة
وختاما لكلامى احنا بعمل ونشتغل النهاردة عشان اخرتنا عشان ندخل الجنة
اعمل لاخرتك
اخرتك دى هى بكرة والعمل دا هو امبارح والنهاردة
السؤال هنا بقى
وهو بكرة بيجى بيستننا لحد ما نجيلة ولا بيمشى ؟؟؟؟؟؟؟؟
يعنى بكرة هتخرج من الكلية هقوم اصحى الصبح من النوم هلاقينى اتخرجت؟؟؟؟؟؟؟؟؟
الاجابة ع السؤال دا هو الموضوع كلة

فى الطريق

Posted on 7:30 ص - by smsma

فى الطريق
فى الطريق بنقابل ناس وبنعرف ناس وبنشوف ناس وبنسمع ناس
ونضحك مع ناس ونتكلم مع ناس
فى كل الاحوال احنا بنتعامل مع ناس
فى الحقيقة انا ما بركبش قطار بس اكتر حاجة تعبر عن الطريق
فى الطريق بنعدى على محطات بس كل محطة ليها اهمتها
الطريق اللى بتكلم علية هو حياتى وحياتك وحياتنا كلنا
اول محطة وقفنا فيها
الابتدائى كنا لسة صغيرية فينا براءة
شايفين الدنيا جميلة رمين الهموم وراى ظهرنا مش حاسين بيها
بنلعب ونضحك ونهزر ونام ولينا اب وام مسؤلين عننا واحنا مش متحملين اى مسؤلية
محطة من اهم المحطات بالنسبة للاب والام لانها محطة تربية الطفل ونشاتة نشأة سليمة
محطة انا بسميها محطة اكتشاف الدنيا
تانية محطة
الاعدادى كبرنا شوية فهمنا شويتين
محطة احلام بنحلم فيها كتير بقول نفسى اطلع زى فلان وزى فلان
نفسى اعمل كذا وكذا واقول انا فلان الفلانى واكتب كل حاجة واى حاجة
محطة ليست تحديد هدف ولا مستقبل ولكنها محطة احلام
وكل ما كترت الاحلام كل ما زادت فرصتك فى الاختيار فى المرحلة اللى بعدها محطة بيبدا فيها قصص الحب اللى ممكن يتعمل منها مجلدات
تالت محطة
الثانوى كبرنا اوى فهمنا مسؤليتنا كان عندى احلام كتيرة
هختار منهم حلمين تلاتة والباقى كانوا استبن بشتغل كتير بتعب كتير
عشان فوجئت بالمسؤلية اللى عليا مش شايف قدامى غير مستقبلى ودراستى
محطة كلها مطبات اما اعدى المطب بسلام اما اقع فى المطب وساعتها اما حد يساعدنى عشان اقوم اما اساعد نفسى اما افضل فى المطب لحد ما يجى القطار اللى بعدى يدوسنى
رابع محطة
الجامعة محطة راحة نفسية فى الاول وفى اخرها مطب كبير جداااا
محطة اثبات نفسى محطة لازم اكون واثق من نفسى لازم اكون مستعد لكل خطوة محطة لازم احدد انا عاوز اية ولية وامتى وازاى؟؟؟؟
محطة فيها مشاعر جميلة جدااا وفيها استغلال وحش جدااا
محطة جميلة بشبابها جميلة باحلمها اللى بتحقق
محطة من اجمل المحطات اللى بتعدى وتفوت بسرعة
بس فى اخر المحطة مطب كبير ممكن يبقى الجيش للولاد وممكن يبقى مسؤلية بيت للبنات ولاولاد بردو
خامس محطة
محطة تحول من ان فى حد مسؤل عنك الى انك تصبح مسؤل عن بيت كامل
مسؤل عن حماية البيت
محطة كلها تفكير محطة كلها شغل محطة برغم تعبها انها اجمل محطة
جمالها بيبان فى ابتسامة اطفالها
محطة هتستمر فى العطاء دون توقف وانت وانتى فرحان وسعيد
محطة لازم نعملها حساب
سادس محطة
محطة جمع اعملك وبس محطة تجنى فيها اعملك فى الخمس محطات اللى فوق
محطة لا يبقى فيها الا عملك
محطة مش ملكك محطة اما ان تترك اثر فى الناس وتكون قدوة ليهم
اما ان لا يتذكرك احد الا بالسوء
محطة تتمنى ان تكون نهيتها بين يدى الله
يارب احسن خاتمتنا
فى وجهة نظرك ما هى اجمل محطة؟؟؟؟؟؟
Asmaa Ali
بالتوفيق للجميع
وتحياتى

just Answer

Posted on 8:55 ص - by smsma

فى البداية سمسمة هى اللى عملت الموضوع فى بلوجها

وبعدها دبست هاجر وبعدين هاجر دبست كات كات وبعدين كات كات دبست ياسمين
وبعدين ياسمين دبستنت هند وبعدين هند دبستنى
لن ولم وكل ادوات النفى انى اسنى الموقف دى يا هند ....ههههههههههههههه
الموضوع بإختصار زي ما شفته في بلوجات ومدونات كتيــــــــر
عباره عن اعتراف عن 6 أسرار في حياة كل شخص محدش يعرفه غيره
وبعد كده الشخص الي اعترف ده بيختار 6 أشخاص يعترفوا بعده بس كل واحد في بلوجه
انا غيرت الفكره خالص
انا عايزة أعترف مثلا ب 6 اعترافات وهكتب اسم حد واحد بس يعترف بعدي في البلوج بتاعه
ولما يعترف هو كمان يختار حد واحد بس … وهكذا دواليك

ابدأ اعترفاتى

1-

انا بكرة الحسد جدااااااااااااااااااااااااااااا

وما بعرفش اتبع اسلوب (دارى على شمعتك تأيض)

بكرة الصفة دى اوى لانى شوفت منها كتير اوى

2-

انا ما بعرفش اجامل خاااااااااااااالص

يعنى انا مش مجاملة ودى احيانا بيعملى مشاكل

فى نفس الوقت مش هقول كلمة تزعل حد منى بس مش هجامل

3-

كنت فى يوم من الايام رياضية بمعنى الكلمة

كنت بلعب تنس

ودخلت 25 بطولة وطلعت المركز الاول فى 22 بطولة والتانى فى 2 ولا مركز فى بطولة واحدة

وكانت اسوء بطولة دخلتها

من اجمل فترات حياتى وعمرى ما نسيتها

ولكن للاسف سبت كل حاجة والنادى فى 3 اعدادى اول ما دخلت ثانوى بسبب ادراسة ومستقبلى

ودى اول زعل حصل بينى وبين بابا مش زعل بمعنى الكلمة بقدر ما كان حزن لانى كدا كدا كنت هسيب النادى فى يوم من الايام والحمد لله ما حصلش زعل تانى بعدها

4-

فى ناس عارفة وناس ما تعرفش

انى ليا اخت توأم

اول ما اسافر ببقى زعلانة انى سبتها ومشيت

بس تعرفوا ان الحكاية دى حلوة عشان اعرف معزتى عندها

ولسة ما بقيتش خالة اختى الكبيرة مخطوبة لسة ما اتجوزتش

وللاسف انا مش هكون عمة عشان ما ليش اخ

5-

اول ما روحت المنصورة حسيت انها اسكندرية التانية

بجد حسيت انى مش غريبة انها بلدى هنتلزق فى بتوع المنصورة

بس تعبت جدا فى التعامل فى الاول عشان اللهجة الاسكندرانى

بحاول ما اتكلمش بيها خاااااالص مع اصحابى عارفين لية طبعا ودى كانت مشكلة كبيرة بس دلوقتى خلاص

نسيت اللهجة الاسكندرانى خالص

6-

اخر اعتراف ليا انى بحب اصحابى اوى وبحترم زميلى جدااااااااااااا

وما بحبش حد يزعل منى ابدا

ومن نحيتى انا ما بزعلش من حد خالص

بس الاعتراف دى ممنوع استغلالة
هدبس مين؟؟؟؟؟؟؟؟؟؟؟؟؟
مين؟؟؟؟؟؟؟؟؟؟؟؟
مين؟؟؟؟؟
مين؟؟
مين؟
انا هدبس واحدة بحبها جدا وعاوزها تسلمالى على حسام
طبعا هدبس هبهوبة حيبتى
كل تدبيسة وانتى طيبة

الو ....الو....هل تسمعنى ؟!

Posted on 1:33 م - by smsma
ابيات شعر للشاعر الجميل جداااااااااااااااااااااااا
على سلامة
انا بصراحة استمتعت فقولت اخليكم تستمتعوا معايا
نـاقص حته
ناقص حته
وكل ما أوزن
ألاقي لسه
ناقصلي حته
أحط حته
تقل حته
وأجيب قميص تضيع چاكته
وأعيش لي ساعة
يفوتني سته
وكل ما أوزن
ألاقي ناقص
أقول بناقص لو هي حته
أتاري لسه
ولسه تاخد
سنين وحته
وحاجات تسيبني
وحاجات تاخدني
لحاجات تخبط
في كل حته
وأقول ها نفرح
ف يوم
ها نفرح
ويوم مانفرح
علي الله يفضل
في القلب حته
مــــــــــــــــــرايا
قلت أبص ف المرايا ..
يمكن أكون إحلويت .
.فضلت داير أبص ..
مخلتش ولا مرايا ف البيت ..
في الحمام ف الأودة ف دولاب .
.أو متعلقة ع الحيط ..
شوفت ..
سكت شويه ..
وبعدين إتخضيت ..
معقول أنا قضيت العمر ده كله ..
وزي ما روحت زي ما جيت ..
معقول أنا عمري مافكرت ولا إتغيرت ولا حبيت ..
وإزاي ساكت علي روحي ده كله ..
وليه إستنيت ...
!يا ريتني ما كان عندي مرايا ..
وياريتني ما بصيت
انا حبيت اختمها بحاجة تضحك وتبكى
بس انا عاوزاكم تتضحكوا مش تبكوا
1-ألو ألو..
هل تسمعني؟!
بكلم حضرتك من قدام..
فرن الحاج أبو صلاح..
كله سعادتك تمام..
والشعب مستمر ف الكفاح..
لا يا فندم مفيش قلق.
.شوية كسور وكدمات..
واللي مات مات..
واللي راح راح..
الحمد لله زي الفل..
ويا رب ديماً..
من نجاح لنجاح..
معايا يا فندم..
ورحمة أمي مبسوط ومرتاح.
.كله من خير سعادتك.
.إحنا بس محتاجين خميرة بيرة.
.لأ يا فندم.. بيرة إيه..
أستغفر الله..
هو أنا بتاع كده.
.أكلم حضرتك بعدين بقي..
عشان تقريباً الكارت خلص
..2-ألو ألو..
هل تسمعني..
بكلم معاليك..
من محطة أبو غريب..
هو يا فندم القطر.
.اللي لا بيودي ولا بيجيب.
.العتمة الكتمة..
الزحمة الكئيب..
الشعب..
ماله الشعب.
.فرحان وإحساسه عالي..
وكل الحالات بتستجيب..
معانا يا فندم..
أجزخانة لكل مواطن وطبيب..
مرهم للحروق.
.ورحمة أمي بعت أجيب.
.طب يا فندم عشان القطر اتحرك..
الموت علينا حق يا فندم..
واللقا نصيب..
3-
ألو ألو
هل تسمعني
بكلم جنابك
من عزبة شحات العريا ن
دي حتة كده يا فندم
بعيدة عن العين
لكن قريبة من حلوان
مفيش ميه يا فندم.
.لكن مفيش حد عطشان
نورملوش لزوم
النور يا فندم
كفاية الإحساس بالأمان
أنا ورحمة أمي زي الفل
مناخيري
لأ.. ده دور برد من زمان
الشعب مبسوط وبيغني وفرحان
ما هي مصر حضرتك
إمبارح كسبت السودان
طب يا فندم
عشان تقريباً البيت بيقع
لا إله إلا الله
4-ألو ألو..
هل تسمعني..
بكلم معاليك م المستشفي..
آه والله العظيم.
.تصور.
.كبد البلد سليم..
ووشها منور..
قطن وشاش..
لأ يا فندم ما يلزمناش..
ده الشعب كله متعور..
دكاترة..أشعة..تحاليل..
ده ترف يا فندم..
أوامر سعادتك..
ورحمة أمي هادور..
رسم قلب..
عارفة يا فندم.
.بتاع طويل كده ومدور.
.بعد إذن حضرتك يا فندم..
جالي كرشة نفس..
تقريبًا بموت.
.الدوام لله يا فندم.
.5-ألو ألو..
أوطي صوت التليفزيون
إزاي يا فندم..
ده أنا بتكلم من سوق الخضار.
.طول عمرها القوطة مجنونة سعادتك..
بس الجديد بقي الخيار..والبطاطس..
هايصة خالص..
عشان الزيت أسعاره نار.
.والكوسة شكلها يفرح.
.ماشفتهاش أبدا كده..
والشمس طالعة.
.وف عز النهار.
.المواطن.
.نفس الابتسامة العريضة
حضرتك..
هيموت م الفرح..
خصوصا بعد ما سمع..
عن علاج البواسير بدون جراحة..
إمبارح ف نشرة الأخبار.
.المشكلة أنا يا فندم.
.من يومين كده.
.ابتدي يلعب ف عبي..
ييجي مليون فار
..6-إيوه يا فندم..
بكلم سعادتك م الاستاد.
.عارف يا فندم إن المباراة مذاعة.
.بس قلت أشيل علم..
وأفسح الولاد والجماعة..
أنا..
أهلاوي يا فندم.
.ورحمة أمي عن قناعة..
الأهلي حضرتك..
مش إجوان بحرفنة وشجاعة.
.الأهلي رغيف العيش..
أنبوبة البوتاجاز..
والسد العالي.
.اللي بيحمي مصر من المجاعة.
.هو البطل.
.هو عم توفيق التمرجي.
.اللي بيدي حقنة ف العضل..
ينام الألم كام ساعة..
مصدر الفرح الوحيد للشعب..
والزمالك أكيد.
.مقدر الظرف الصعب..
تصور الموقف يا فندم.
.لو الأهلي ماعندوش قلب.
.أو بعد الشر بعد الشر.
.اللاعيبة عضهم ف رجليهم كلب.
.وراح الدوري والكاس..
قوللي بقي سعادتك..
هاتفرح بإيه الناس.
.طبعًا الزمالك.
.هايعمل م القصيدة دي شماعة.
.وكل مرة يتغلب ستة.
.وهات م الشبكة يا معلم..
طب يا فندم
أكلمك بعد الماتش..

مشكلتى !!!!!!!!

Posted on 5:10 ص - by smsma

مشكلتى مع نفسى
انا فيا مشكلة انى بحب اقعد لوحدى كتير
ودى بيزعل ناس كتير اوى منى بس والله من غير قصد
انا اصلا ما اعرفش انا لية كدة
بس اللى انا عارفة كويس انى بكون مرتاحة وانا وقعدة مع نفسى
يعنى مثلا ناس جاين يزرونا طبعا بطلع اسلم عليهم واقعد شوية وادخل بعد كدة
دى بقى ما بعجبش ماما ولا بابا ولا اخواتى عاوزينى اكون قعدة طول ما هما قعدين
ولو خرجنا انا بحب اتكلم واضحك وقت الكلام والضحك لكن فى وقت بحب الصمت
يعنى فيا حاجة غريبة انى بحب اتفرج ع الناس وهما مشيين والشوارع والانوار ببقى مبسوطة جدااااااااااا
اصحابى بقى لازم يرخموا معايا ووالله انا بحبهم جدا وبحب اضحك معاهم واتكلم ولكن مش طول الوقت
الموضوع دة مضيقنى جداااااااااا ونفسى اغيرة فيا بس مش عارفة لانة بيزعل ناس كتير منى
دى مشكلتى نفسى القى حل للموضوع دى
لانى يوميا لازم ادخل فى مناقشات وحوارات عنيفة بسبب الموضوع دى
مشكلتى!!!!!!!!!!!!

congratulation

Posted on 8:12 ص - by smsma




مبروك

كلمة تقال فى المناسبات السعيدة

ومن هذة المناسبات نجاحى ونجاح اصحابى ونجاح زميلى

بس قبل ما اقول مبروك عاوزة اقول

فى سنة عدت كان فيها الوحش وكان فيها الحلو

فى الحالتيين احنا استفدنا بس بشرط

الخطأ اللى حصل امبارح ما يحصلش بكرة ولا بعدة ولا حتى بعد سنة

كدا اقول مبرووووووووووووك بقلب جامد

بالنسبة للناس اللى معاة مادة او مادتيين او السنة كلها

عاوزة اقول كلمة ليهم

انا اتعلمت من الدنيا دى

ان الانسان مش بياخد كل حاجة هو عاوزة

وكمان

اسعى يا عبد وانا اسعى معاك

وكمان

الضربة اللى ما تكسرنيش تقوينى

وكمان

احنا بحارب الزمن والزمن اللى عدى اسهل من اللى فات بكتييييييييييير لو انكسرت دلوقتى هتعمل اية بكرة

فى الاخر

انت عليك جزء من اللى حصل انت مسؤلية عن تصليحة

هنعمل السنة اللى جاية ان شاء الله

اقعد مع نفسك وشوف ابدا منين وما تفكرش تقف فين

كل ما افتكر ان بكرة انا هروح الكلية هكتب تالتة حاسبات ومعلومات

اقول ياااااااااااااااااااااااااة دى انا كنت امبارح بمحتن امتحان الثانوية العامة

الايام بتجرى وانا كمان لازم اجرى بس ع اد خطوطى ما اوسعهاش عشان اسبق لانى هقع لو وسعتها

ولعل وعسى الزمن يتعب فى السكة فبقى جنبة وماشية معاة ولو حصلتة هرجعلة تانى عشان اسندة وقف معاة زى ما وقف معايا كتيييييييييييييييير

بالتوفيق يا احلى اصحاب

وبالتوفيق لكل زميلى

وان شاء الله السنة اللى جاية افضل من اللى فاتت

ومن تقدم لتقدم بس ما ننساش

"الانسان مهما وصل ومهما تفوق فى الاول والاخر هو انسان من طين اوعى تتكبر ع الزمن فى يوم من الايام"

مبروووووووووووووووووك

سلام



الاشتراك في: الرسائل (Atom)

Search

© asmaa CS
Wordpress Theme designed by DT Website Templates | Bloggerized by FalconHive